Ен Хаубек е новинарка од 1993 година. Работи во Данската радиодифузна корпорација, води неделна радио емисија за европска политика и тековни настани, продуцент е на документарни радио емисии, член на одборот на Данското здружение за истражувачко новинарство, координатор за Македонија и Косово.
Барбара Матејчиќ е од Загреб, Хрватска. Својата новинарска кариера ја започна по студиите по хрватски јазик и книжевност на Факултетот за хуманистички и општествени науки при Универзитетот во Загреб. По години работење во дневниот национален весник Вјесник, пишувајќи претежно за култура, таа стана слободен новинар кој се фокусира пред сè на социјална правда и човекови права. Барбара пишува приказни од човечки интерес и истражувачки извештаи за печатените и онлајн медиуми во Хрватска и регионот на Балканот. Барбара е исто така и член на комисијата и хрватски координатор за СКУП, данска мрежа за истражувачко новинарство и редовно придонесува кон БИРН (Балканската истражувачка мрежа). Таа ја доби наградата за најдобра покриеност на правата на ЛГБТ во последната деценија (2000-2010).
Бригит Алфтер е ко-основач на Journalismfund.eu со Идес Дебрин. Таа е директор чија цел е да го воспостави и развие моделот. Journalismfund.eu дава истражувачки грантови на мали тимови новинари за прекугранични и европски приказни со цел да се зајакне висококвалитетното новинарство во Европа. Во својот советодавен одбор Journalismfund.eu обединува голем број организации и центри за истражувачко новинарство, како и поедини новинари ширум Европа. Во своите блогови пишува за различни аспекти на новинарството и транспарентноста во Европа, и тоа Watchdog Blog за EUobserver наменет за европската публика, блогот Grænseoverskridende во данското списание Journalisten.dk наменет за данска/нордиска публика.
Дејвид E. Каплан е директор на Глобалната мрежа за истражувачко новинарство, здружение на повеќе од 70 организации ширум светот посветени на проширување и поддршка на истражувачко новинарство. Повеќе од 30 години тој раководи непрофитни редакции, истражувачки тимови и прекугранични проекти. Каплан известувал од дваесетина земји и неговите стории имаат добиено повеќе од 20 награди. Тој е четирикратен добитник на наградата за истражувачки новинари и уредници, вклучувајќи три медали, највисоката почест на IRE (Истражувачки новинари и уредници). Неговата работа е исто така четири пати наградувана од страна на OPC, како и Американската правна асоцијација, Асоцијацијата на новинари за здравствена грижа, како и WAC. Каплан работи за Советот за глобална агенда за организиран криминал на Светскиот економски форум и е уредник на Проектот за известување за организиран криминал и корупција. Една од неговите книги, Јакузи, издадена е на 12 јазици и се смета за стандардна референца за јапонската мафија. Каплан работи во областа на развој на медиумите веќе 20 години и има обучено повеќе од илјадници новинари ширум светот на своите работилници за истражувачко новинарство.
Дру Саливан е искусен новинар и специјалист за развој на медиуми кој речиси една деценија има работено во Источна Европа и Евроазија. Тој е основач на Центарот за истражувачко новинарство во Босна и Херцеговина во 2004 година и работи како директор, уредник и сега советувачки уредник на организацијата. Тој е ко-основач и прв директор на Програмата за известување за организиран криминал и корупција, регионален конзорциум на истражувачки центри, каде е советувачки уредник. Тој е основач на Мрежата за развој на новинарство, иновативна организација за развој на медиумите со програми низ целиот свет. Како новинар, тој го предводеше тимот на новинарите во потрага по корупција од страна на босанскиот премиер што доведе до негово обвинение и оставка. Добитник е на наградата Даниел Перл, наградата за онлајн новинарство за истражувачко новинарство, наградата Global Shining Light за известување под принуда, наградата Том Ренер за известување за криминал и многу други меѓународни награди. Тој работел како истражувачки новинар за весникот Тенесиан во Нешвил и за Тимот за специјални задачи на Асошиејтед прес во Њујорк. Бил член на бордот на директори на Истражувачки новинари и уредници и Националниот институт за известување со помош на компјутер. Пред да стане новинар, работел како воздухопловен инженер на проектот за вселенскиот брод на Меѓународните вселенски системи Роквел.
Хенрик Кауфхолц е член на одборот на Данското здружение за истражувачко новинарство, поранешен директор на СКУП, а сега координатор за Молдавија, Украина, Белорусија, Русија и Ерменија. Во одборот е на следната Глобална конференција за истражувачко новинарство. Новинар од 1967 година, во Политикен од 1974 година. Дописник во Бон 1981-85 година, пишувал за Балканот од Копенхаген 1990-1995 година, дописник во Москва 1995-97 година и Берлин 1997-2002 година. Од 2007 до 2009 година бил арбитер на Политикен, сега е во дописна редакција.
Катерина Спасовска е доцент при Универзитетот на Западна Каролина, отсек комуникации. Таа предава пишување вести и меѓународни медиуми. Таа има докторат од Универзитетот во Тенеси. Нејзините истражувачки интереси се во новинарството, развој на медиумите и медиумите на малцинствата во Југоисточна Европа. Таа работи како новинар во Македонија 14 години во областа на економијата и проблеми поврзани со човекови права и како истражувачки новинар и уредник. Од 2005 до 2007 година беше координатор на СКУП за Македонија.
Пол Раду е извршен директор на Проектот за известување за организиран криминал и корупција и ко-креатор на концептот за Контролна табла за истражување и проектот RISE, нова платформа за истражувачки новинари и хакери во Романија. Тој е добитник на голем број стипендии, вклучувајќи Алфред Френдли во 2001 година, Милена Јесенска во 2002 година, Розалин Картер за новинарство за ментално здравје во 2007 година, Најт меѓународно новинарство во 2008 година од страна на Меѓународниот центар за новинари, како и Стенфорд Најт новинарство 2009-2010 година. Добитник е и на бројни награди вклучувајќи Најт меѓународно новинарство и наградата за истражувачки новинари и уредници во 2004 година, Global Shining Light во 2007 година, наградата Том Ренер истражувачки новинари и уредници и во 2011 година наградата Даниел Перл за најдобро меѓународно истражувачко новинарство.
Станимир Вагленов е шеф на Одделот за информации и онлајн услуги во Медиа Груп Бугарија и предава истражувачко новинарство на Универзитетот во Софија. Во 2007 година го основал Центарот за бугарско истражувачко новинарство во Софија. Станимир ја има добиено наградата Даниел Перл за Програмата за известување за организиран криминал и корупција, а во 2011 година ја доби наградата Global Shining Light во Торонто, Канада со друг тим новинари. Во септември 2003 година ја издаде својата прва книга за новинарско истражување на бугарски јазик.
Џон Холанд е консултант и обучувач на албански новинари чија специјалност е покривање судски прашања, човекови права, законодавство и јавна корупција. Тој исто така осмислува и имплементира нов Независен медиски центар, кој ќе треба да претставува форум каде новинарите и граѓаните ќе дискутираат проблеми поврзани со правдата и корупцијата со кои се соочува земјата. Холанд има работено во OCCRP како истражувачки уредник одговорен за обука, уредник и советник на новинари од осум земји од источна Европа.
